የአዲስ አበባ ሀገረ ስብከት አስተዳደር ጉባኤ የሚታይ የሚጨበጥ ለውጥ ለማምጣት የሚያስችሉ ጉዳዮች ላይ ውሳኔ አሳለፈ።

የአዲስ አበባ ሀገረ ስብከት አስተዳደር ጉባኤ በተቋሙ የሚታይ የሚጨበጥ ለውጥ ለማምጣት የሚያስችሉ ጉዳዮች ላይ ውሳኔ አሳለፈ።

በቅርቡ የተመደቡት መልአከ ብርሃን ሰሎሞን በቀለ የአዲስ አበባ ሀገረ ስብከት ሥራ አስኪያጅ አዲሶቹንና ነባር የዋና ክፍል ሐላፊዎች ጋር መደበኛ የአስተዳዳር ጉባኤ ማካሔድ ጀምረዋል።

በቋሚ ቅዱስ ሲኖዶስ ውሳኔ መነሻነት በመንበረ ፓትርያርክ ጠቅላይ ቤተ ክህነት ጽ/ቤት ዋና ሥራ አስኪያጅ ብፁዕ አቡነ ሳዊሮስ የተመደቡ የአዲስ አበባ ሀገረ ስብከት ዋና ሥራ አስኪያጅ መልአከ ብርሃን ሰሎሞን በቀለ ከአዲሶቹና ከነባሮቹ የዋና ክፍል ሐላፊዎች ጋር በመሆን መደበኛ የአስተዳዳር ጉባኤ ጀምረዋል።

የጉባኤ ላይ ነባሮቹ የሥራ ሐላፊዎች ለአዲሶቹ የዋና ክፍል ሐላፊዎች እንኳን ደህና መጣችሁ በማለት መልካም አገልግሎት ምኞት የተመኙ ሲሆን በአንድነትና በኅብረት የቤተ ክርስቲያን የጣለችብንን አደራ ለመወጣት የሚቻለንን ሁሉ እናደርጋለንም ብለዋል።

አዲሶቹ የሥራ ሐላፊዎች በበኩላቸው ስለተደረጋላቸው መልካም አቀባበል አመስግነው አገባባችን መልካም እንደሆነ በሥራችን ለመግለጥ የእግዚአብሔርን ቸርነት ተማምነን የበኩላችንን እንወጣለን ብለዋል።

ክቡር መልአከ ብርሃን ሰሎሞን በቀለ በበኩላቸው “ሰማይ ሩቅ አደራ ጥብቅ” እንደሚባለው ከቤተ ክርስቲያን የተሰጠንን ሕያው ተልእኮ ለውጥ በማምጣት ያከበረችንን ቤተ ክርስቲያን፣ የመረጡንን አባቶችን፣ ተስፋ ያደረጉንን የሀገረ ስብከቱንና የአብያተ ክርስቲያናቱን አገልጋዮች እንዲሁም ቡሩካን ምእመናንን ማስደሰት ይገባናል ብለዋል።

አስተዳደር ጉባኤውም ክቡር ሥራ አስኪያጁ ባነሱት የሀገረ ስብከቱ የአሠራር ለውጥ ጉዞ ላይ ከተወያየ በኋላ ከዚህ በታችን በተዘረዘሩት ጉዳዮች ላይ የጋራ ስምምነት ላይ በመድረስ ውሳኔ አሳልፏል።

ከዚህ ቀደም በተለያየ ምክንያት ከመደበኛ የአገልግሎት ሥራቸው የታገዱ ሠራተኞችን ጉዳይ ቅድሚያ በመስጠት ሕግን ተከትሎ መፍትሔ እንዲሰጥ ውሳኔ ተላልፏል።

የአብያተ ክርስቲያናት የደመወዝ ጭማሬን አስመልክቶም በሕጉና በአሠራሩ የተቀመጡትን መስፈርቶች ማሟላታቸውን በሚመለከተው አካል በማረጋገጥ በጥቂት ቀናቶች እንዲጸድቅላቸው ከዚሁ ጋር በአንዳንድ አብያተ ክርስቲያናት በሕገውጥ መንገድ ለደሞዝ ማጸደቂ በሚል የሚደረጉ ሕገወጥ ድርጊቶች እንዳይኖሩና በዚህ ሕገወጥ ድርጊት ሲያስተባብርና ሲተባበር የተገኘ አካል አስተዳደራዊ ርምጃ እንደሚወሰድበት ተገልጿል።

የቤተ ክርስቲያናችንን አደራና ሐላፊነት ለመወጣት ይቻል ዘንድ ሁሉም በየተመደበበት የቤተ ክርስቲያን ተልእኮ ሐላፊነት ላይ የድርሻውን እንዲወጣ አስተዳዳር ጉባኤ አሳስቧል።

በሀገረ ስብከቱን የሚስተዋሉና የተስተዋሉ ችግሮች ምክንያታቸው ብዙ ጉዳያቸው ውስብሰብ በመሆኑ ለሁለንተናዊ መፍትሔ ሁለንተናዊ ትብብርና የእኔ ባይነት በእጅጉ ያስፈልጋልም ብሏል ጉባኤው።

ስለሆነም ስር ነቀል ለውጥ ለማምጣት ድጋፍ ሊሆኑ የሚችሉ ሕገ ቤተ ክርስቲያንን፣ ቃለ ዓዋዲን፣ የመንበረ ፓትርያርክ ጠቅላይ ቤተ ክህነት ጽ/ቤት የሠራተኛ መተዳደሪ ደንብንና የሀገረ ስብከቱን ደንብ በተጨማሪም በቅዱስ ሲኖዶስና ቋሚ ሲኖዶስ የተሰጡ መመሪያዎችን ጋር በማገናዘብ መፍትሔ የሚሰጥና ሐላፊነትነ ከተጠያቂነት ጋር የጣመረ የውስጥ አሠራር System ለመዘርጋት ውሳኔ አሳልፏል።